تاج 2 & 3

وصلنى تاجين من أختى الفاضلة سمسم ... مدونة بحبك يامصر فشكرا جزيلا لها ، أترككم مع الإجابات

التاج الاول

اول سؤال:من انت؟
مسلم عربى مصرى وأفتخر

تانى سؤال:بطاقتى الشخصية
الاسم : عبدالرحمن
المهنة :رايح تالتة طب أسنان جامعة طنطا
تاريخ الميلاد : 5-1-1989
محل الاقامة : ميت غمر ، محافظة الدقهلية
الديانة : مسلم
الحالة الاجتماعية : أعزب

تالت سؤال :ماهى احلامك؟
أحلامى كتيرة جدا ، ومش هقدر أكتبها كلها ، لان فى شوية منها أسرار خاصة جدا ، لكن بعض أحلامى هى
1- انى أكون طبيب أسنان مسلم ناجح جدا ومتميز جدا ومشهور جدا ، مش عشان الشهرة بس عشان أكون صورة كويسة للاسلام
2- انى انجح كأديب سواء كشاعر أو ككاتب قصص قصيرة ، وان كنت أنا شايف ان انا بكتب قصص أحسن من الشعر، وإنى أقدر من خلال كتاباتى انى أوصل رسالة هادفة للناس
3- انى أسافر معظم الدول الاوروبية وعلى رأسها فرنسا ، إيطاليا ، إنجلترا ، النمسا ، أسبانيا .. وبالذات أسبانيا دى عشان أشوف آثار أجدادنا العظماء فى الاندلس ، وكمان تركيا
4- انى أتجوز بدرى ، وربنا يرزقنى بالزوجة الصالحة اللى تعيننى على رسالتى ويكون عندها إستعداد كبير جدا جدا للتضحية ، لأنى ماعتقدش ان الطريق اللى انا اخترته هيكون سهل خالص ، وإن ربنا يرزقنى أنا وهى أولاد نربيهم تربية إسلامية ، ويكونوا شخصيات عظيمة لما يكبروا
5- بحلم انى أكون سبب من أسباب تقدم مصر ، لانى بجد زعلان عليها جدا ، ونفسى أعمل أى حاجة عشان أخرجها من الحفرة اللى هى واقعة فيه دى ومافيش حد عارف يخرجها


رابع سؤال:من اقرب شخص ليك؟
كلمة أقرب شخص ليا دى كلمة واسعة جدا ، يعنى أنا معرفش معناها ايه بالظبط ، بس لو معناها اللى بحكيله أسرارى وهمومى ، فمافيش حد بحكيله أسرارى خالص ، لانى كتوم جدا ، أما لو معناها اللى بحب أقعد معاه وأكلم معاه وببقى مستمتع جدا وانا بدردش معاه ، فالاجابة هتبقى والدى ربنا يكرمه ، مع إنى مابشوفهوش كتير عشان مسئولياته الكتيرة جدا ، لكن ببقى فى منتهى السعادة لما بقعد معاه ويقعد يحكيله على ذكرياته وهو صغير أوهو فى الجامعة أو ذكرياته فى شغله ، بجد بحس ان انا فى نعمة كبيرة جدا ، ربنا يباركلنا فيه يارب ويعينه على مسئولياته ، اللهم آمين

*************
التاج الثانى

اول سؤال:اية معنى السعادة من وجهة نظرك؟ حاسس انك سعيد ؟
معنى السعادة فى وجهة نظرى هى الحاجة اللى احنا هنحسها واحنا فى الجنة ، بس ربنا بيدوقنا حاجات بسيطة منها فى الدنيا عشان نبقى مشتاقين أوى للجنة
أما سؤال حاسس ان انا سعيد ، فأنا دقت من السعادة اللى ربنا بيدوقهالنا ، لكن بالتأكيد مش سعيد طول الوقت ولا حتى وقت كبير ، لان زى ماقلت ده مش هيحصل غير فى الجنة

تانى سؤال:امتى حسيت انك ظلمت انسان ولية ؟ محتاج للحظة غفران منة ؟
معتقدش ان انا ظلمت حد ، مش عشان أنا حلو وماحصلتش ، أبدا والله ، بس الفكرة ان احنا لسة صغيرين يعنى لسة مادخلناش الدنيا بجد ، ففرص ان احنا نظلم حد دلوقتى بتبقى قليلة شوية

تالت سؤال:بتعمل اية لما تكون مضايق بعد ما تصلى ؟
السؤال ده مش فاهمه ، يعنى ايه أبقى مضايق بعد ما أصلى
هو أنا ممكن أفسر السؤال على انه بعمل ايه لما بكون مضايق غير انى اصلى ، والاجابة انى بقفل على نفسى الأوضة وأقعد لوحدى شوية حلوين وعادة ببقى قاعد فى الضلمة ، لحد ماحس ان انا فكيت ، وأنا بعمل كده لانى زمان كنت لما بضايق بطلع غلى فى البيت كله وبعدين لما عقلت شوية قلت لنفسى انهم مالهمش ذنب فى ضيقى أو زعلى ، فبقيت بقعد لوحدى عشان ماخنقش على حد ، بس أحيانا هم مابيتفهموش انا ليه بقعد لوحدى ، برضه أحيانا لما ببقى مضايق بمسك ورقة وقلم وبقعد أكتب أى حاجة ، أى كلام بييجى على دماغى بكتبه ، ده بيطلع من جوايا حاجات كتيرة أوى

رابع سؤال:امتى حسيت انك اتظلمت ؟ولية ؟
أنا شفت الظلم بعينيا كتير جدا جدا لكن أبرز 3 حاجات هم :
1- وانا فى تانية ثانوى نقصت 4 درجات ونصف فى المواد كلها ، ونقصت 9 درجات فى الأحياء لوحدها ، فمجموعى كان وحش جدا ، فرحت أنا ووالدى كشفنا على الأحياء ، لقيت إن أنا ليا 6 درجات ، ورفعنا قضية ،وأنا دلوقتى رايح رابعة كلية أهو ،والقضية لسة شغالة
2- لما والدى أعتقل فى انتخابات مجلس الشعب ، وخصوصا ان انا الوحيد فى اخواتى اللى شهدت عملية الاعتقال ، بجد منتهى الظلم ، انك تلاقى شوية عساكر بيخبطوا على الباب الساعة 3 بالليل ومش قادرين حتى يبصوا فى وشنا من احراجهم ، لدرجة ان فى عسكرى منهم لما شاف والدى فى المركز انفجر فى العياط ، لانه مش متخيل ان راجل زى ده ممكن ييجى يوم ويعتقل فيه ن بس عادى دى ضريبة الطريق اللى احنا اخترناه ، واحنا مستعدين ندفعها وفى أى وقت
3- لما والدى كان مرشح فى انتخابات مجلس الشورى اللى فاتت ، بجد بجد منتهى الظلم انا شفته فى الاسام دى ، لدرجة ان والدى كان أول مرشح يعتقل فى تاريخ الانتخابات ، لان أصلا المرشح معاه حصانة ، ده غير بقى المطاردات اللى اكنت بتحصل ، وكان أى حد يعلق أى دعاية لوالدى كان يعتقل ، وكان ممنوع عمل مسيرات أو مؤتمرات انتخابية ، ويوم الانتخابات اتقفت كل اللجان ، واى حد يتعرف انه راح يرشح والدى كان يعتقل ، واتعمل محاضر ضبط وإحضار لأخويا محمد ، عشان يضغطوا على والدى ، كل ده عشان والدى كان هيكتسح مرشح الحزب الوطنى لو العملية كانت مشيت سليمة ، لكن زى ماقلت فوق دى ضريبة الطريق اللى اخترناه واحنا راضيين بإن ده يحصلنا ، ومستعدين نسدد التمن فى أى وقت

خامس سؤال:اية اكتر احساس بيراودك هذة الايام تجاة نفسك والاخرين ؟
أكتر إحساس بيراودنى اليومين دول ، انى بشوف الناس ماشييت تايهين فى الشارع ، الكل ماشى بيكلم نفسه ، مش عارف هو ده بيحصل فعلا ، ولا ده مجرد احساس ، بحس ان الناس مكسورة وحزينة

سادس سؤال:امتى ممكن تتنازل عن حق من حقوقك ؟ والسبب ؟
ممكن أتنازل عن حق من حقوقى لما يكون عشان أحافظ على علاقتى بحد بحبه ، يعنى أنا مثلا لو حصل مشكلة بينى وبين زوجتى فى المستقبل ، وانا ممكن أبقى محق وهى مخطئة ، ممكن أتنازل لأنى ممكن أخسر حق من حقوقى مقابل انى ماخسرهاش هى ، مش معنى كده انى هبقى ماعنديش شخصية وكلام من كده ، لا هو المقصود ان فى بعض الشخصيات فى حياة كل واحد فينا ممكن الواحد يتنازل عن حقوق معاهم ماينفعش يتنازل عنها مع الناس العادية
زى مثلا : أسرتى ، عائلتى ، إصحابى القريبين أوى
لان والدى دايما بيقول
"ان أى معركة بين القرايب ، الطرفين فيها خسرانين "

أمرر التاج الفظيع ده ل

النجمة الصامدة
ميرو
غادة & رفيدة