عريس غلبان

هو عبارة عن اسكتش كوميدى وبالمناسبة فقد تم نشره فى الكتاب الاول لرابطتنا ، اتركك معه الآن


( فى الصالون فى بيت العروسة يجلس شاب فى حالة توتر شديد منتظر والد العروسة , يدخل والد العروسة ويصافح الشاب)

والد العروسة:أهلا وسهلا بيك يابنى منور , أهلا وسهلا.
العريس : أهلا بيك ياعمى , البيت منور باصحابه.
والد العروسة : الله يخليك , أأمرنى يابنى
العريس : الامر لله وحده ياعمى
والد العروسة: طيب ياسيدى أنا آسف , اتفضل اكلم
العريس :والله ياعمى أنا محرج من حضرتك جدا وحاسس ان لسانى عليه جبال ومش عارف أقول لحضرتك ايه بس.
والد العروسة: ههههههههه, ليه بس يابنى ؟! اكلم ده أنا زى والدك.
العريس: ماهى دى المشكلة . قصدى , مانا عارف طبعا ياعمى ان حضرتك زى والدى واكتر
والد العروسة : طيب عال أوى , قول بقى انت عايز ايه , وانا سامعك أهو .
العريس: من الاخر كده ياعمى أنا جاى أطلب ايد بنت حضرتك
والد العروسة (مبتسما): ياااااه , طب ودى حاجة تخوف يابنى؟! أهلا وسهلا بيك , بس أنا طبعا لازم أعرف امكانياتك.
العريس : أوى أوى ياعمى , وانا رقبتى سدادة , حضرتك أطلب وانا تحت امرك.
والد العروسة: طيب يابنى ربنا يباركلك. أنا أول حاجة و أهم حاجة عندى هى الشقة , أنا عايز بنتى تتجوز فى شقة فول أوبشن.
العريس: فول أوبشن بس ياعمى , ليه؟! هو بنت حضرتك شوية ,ده أنا بفضل الله أقدر أجيبلها شقة فول أوبشن وشقة فول بالزيت الحار وشقة فول بالزبدة ولو عايزة طرشى أنا سداد برضه.
والد العروسة:ههههههههه ,دمك خفيف جدا يابنى , بس بيتهيالى ده مش وقت هزار .شقة فول أوبشن يعنى كاملة من مجاميعه, 5 أوض نوم و 3 حمامات و مطبخين ده غير الانتريهين والصالة والسفرة ,ولازم العفش يبقى من دمياط. ده غير الغسالة الاوتوماتيك وغسالة الاطباق والبوتاجاز والتلاجة والديب فريزر , وطبعا الدش والتلفزيون والكمبيوتر حاجات مفروغ منها.
العريس(يهرش فى دماغه): أيوة ياعمى , بس دى حاجات كتيرة أوى وغالية أوى
والد العروسة : يعنى هتكون أغلى من بنتى؟!
العريس:حاشا لله ياعمى , بس الكلام أخد وعطى وحضرتك برضه لازم تكون متساهل معايا شوية.

والد العروسة: أكتر من كده يابنى , طب انت عمرك شفت حد بيطلب الطلبات دى بس ؟! يابنى احنا بنشترى راجل.
العريس : طيب ياعمى , نشوف بقية طلبات حضرتك وربنا يبقى يحلها.
والد العروسة: ماشى يابنى . نكلم بقى على المهر , أنا مهر بنتى مايقلش عن 250 الف جنيه , وان كان ده مش قيمتها بس أنا زى ماقلتلك بنشترى راجل.
العريس ( يهرش فى دماغه تانى ): ربع مليون جنيه ايه ياعمى , هو أنا جاى أدفع دية قتيل؟!
والد العروسة: ايه يابنى هو ربع مليون جنيه دول كتير . طب ده انا بنت واحد صاحبى لسة مجوزة وجوزها دافعلها مهر مليون جنيه.
العريس (بصوت منخفض ): ماهو العريس ده أهبل ياعمى , هو حد برضه يدفع مليون جنيه عشان ينكد عيشته , طب ماهو أحسن له يرمى نفسه من البلكونة وينكد عيشته فى جهنم أحلى نكد , وببلاش . استغفر الله العظيم يارب.
والد العروسة : بتقول ايه يابنى ؟مش سامعك كويس .
العريس : لا , مابقولش حاجة ياعمى ,ده انا بقول ربنا يباركلهم ويكرمهم ويهنيهم ببعض , طب من الاخر بقى ياعمى , أخرك فى مهر بنتك كام؟
والد العروسة: يابنى هو احنا بنبيع طماطم!! هو ايه اللى أخرك كام !!
العريس: أنا آسف ياعمى ماكنتش أقصد والله بس حضرتك المبلغ اللى انت قلته ده هو اللى خرجنى عن شعورى, طيب ياعمى نكمل وربنا يسهل فى الاخر
والد العروسة : نخش بقى على الشبكة , انا شبكة بنتى ماتقلش عن 100 الف جنيه - شوف بقى أنا متساهل معاك ازاى- ده بس عشان ارتاحتلك وحسيت انك واد محترم وراجل
العريس : والله العظيم ياعمى ده انت اللى راجل سكرة , وواضح فعلا انك انت متساهل معايا جدا , ربنا يخليك لمصر ويكتر من أمثالك.
والد العروسة : الله يخليك يابنى , ده من ذوقك .
العريس: ايه ياعم انت صدقت ولا ايه ؟! قصدى , ويخليك ياعمى , طب حضرتك فى أى طلبات تانيه تؤمر بيها؟!
والد العروسة : طبعا يابنى , هو حد برضه يكلم على الجواز وينسى الفرح , أنا فرح بنتى لازم يتعمل فى الشيراتون ولا زم ييجى فيه الفنان عمرو دياب والفنان سعد الصغير والفنانة العظيمة نانسى عجرم والفنانة الاسطورة هيفاء وهبى ولو عرفت تجيب بعرور كمان يبقى تمام أوى.
العريس : وتحب حضرتك حسنى مبارك يحضر الفرح ولا مالوش لزوم؟
والد العروسة :لا يابنى مالوش لزوم تتعب الراجل , كفاية عليه الافراح اللى بيحضرها.
العريس : بس هو فى مشكلة صغيرة ياعمى , وهو إن أنا فى الحقيقة عارف ربنا ومابسمعش أغانى أصلا , فمش معقول يعنى فى فرحى هاجيب الناس دي , ده حتى حرام يعنى.
والد العروسة : مالكش دعوة يابنى , هاتهم انت بس وساعة ماييجو يغنوا يبقى سيب الفرح واطلع اشرب لك كباية عصير ولا حاجة .
العريس : دمك شربات والله ياعمى , لدرجة ان أنا هنزل من عند حضرتك على أقرب دكتور نفسانى .
والد العروسة : ليه يابنى؟! هو انت تعبان ولا حاجة ؟
العريس : ماعرفش والله ياعمى , هو أنا كنت سليم لحد ماقابلت حضرتك , بس بيتهيألى دلوقتى ان أنا تعبان.
والد العروسة : ليه يابنى هو أنا قلتلك حاجة زعلتك ولا حاجة؟
العريس : لا أبدا ياعمى , حاشا لله , هو حضرتك قلت حاجة خالص . بس حضرتك ياعمى أنا مش أد الحاجات الكبيرة اللى حضرتك طلبتها منى دى.
والد العروسة : والله يابنى الجواز قسمة ونصيب , وأنا قلتلك اللى عندى , وانا الصراحة مش هارضى لبنتى بأقل من كده.
العريس : يعنى حضرتك بترفضنى ياعمى .
والد العروسة : والله يابنى لو هاتقدر على الطلبات دى فاهلا وسهلا بيك .
العريس : حتى لو قلتلك ان أنا وبنت حضرتك بنحب بعض من خمس سنين ومصرين ان احنا نجوز بعض .
والد العروسة : بتحب بنت مين يابنى ؟ أنا ماعنديش بنات أصلا
ثم يضحك الرجل ضحكة عالية و يقول للعريس : يابنى احنا الكاميرا الخفية , ههههههههههههههه. وبعدين يظهر مجموعة من الرجالة ويصقفوا بحرارة , لكن الواد ياقلب أمه , مااستحملش الصدمة وماحسش بنفسه الا وهو على السرير فى المستشفى والمحاليل متوصله له فى كل حتة فى جسمه , ومافهمش الا بعد فترة ان دى كانت اشتغالة من البنت بتاعته اللى سابها بعد كده وحلف يمين انه ماعاد له دعوة بالحريم بعد كده أبدا .
إنتهت